Grænlendingar hafa ásamt norrænu ráðherranefndinni um jafnréttismál opnað vefsíðu um jafnrétti kynjanna í Grænlandi, Færeyjum og á Íslandi. Vefsíðan mun bjóða norrænum samtökum sem starfa að jafnréttismálum í þessum löndum upp á samskiptavettvang og aukin tækifæri til samvinnu.
 
Ísland, Grænland og Færeyjar eru hin svokölluðu vestnorrænu lönd en þau hafa starfað saman frá árinu 1985 en fulltrúar landanna vilja leggja áherslu á sína sameiginlega sögu og sérstöðu þegar kemur að norrænu samstarfi og samstarfi innan nærrænu ráðherranefndarinnar.

Þegar Ísland fór með formennsku í norrænu ráðherranefndinni árið 2009 var lögð mikil áhersla á kynjajafnrétti í vestnorrænu löndunum með ráðstefnu sem haldin var í Færeyjum þar sem fjallað var um ýmsar hliðar jafnréttismála í þessum löndum. Þegar Danir tóku við formennskunni ári seinna var ákveðið að halda þessari stefnu með ráðstefnu í Grænlandi um vestnorrænt kynjajafnrétti. Ráðstefnan markaði ákveðið upphaf samskipta og samvinnu um jafnréttismál í Grænlandi en hana sóttu stjórnmálamenn, opinberir starfsmenn og samtök frá vestnorrænu löndunum sem vinna að jafnrétti kynjanna. 
Vefsíðan verður virk í tvö ár en að þeim tíma liðnum verður tekin ákvörðun um framhaldið.

Vefsíða um vestnorrænt kynjajafnrétti

Facebooksíða um vestnorrænt kynjajafnrétti